Թողարկում 211

ԵՄ ԱլԳ ՔՀՖ ՀԱՅԱՍՏԱՆԻ ԱԶԳԱՅԻՆ ՊԼԱՏՖՈՐՄԻ

ՀԱՅՏԱՐԱՐՈՒԹՅՈՒՆԸ

Հայաստանի Հանրապետությունում շարունակվող քաղաքական հետապնդումների վերաբերյալ

14 ապրիլի, 2015թ.

Եվրամիության Արեւելյան գործընկերության (ԱլԳ) Քաղաքացիական հասարակության ֆորումի (ՔՀՖ) Հայաստանի ազգային պլատֆորմը խստորեն դատապարտում է ՀՀ գործող իշխանությունների սանձազերծած քաղաքական հետապնդումների նոր ալիքը, որի թիրախում այս անգամ հայտնվել է «Հիմնադիր խորհրդարան» քաղաքացիական շարժումը: Ավելի վաղ, այս միավորման անդամներն իրենց խաղաղ եւ Սահմանադրության տառին համապատասխանող միջոցառումների ընթացքում պարբերաբար հարձակումների են ենթարկվել թե՛ ոստիկանների եւ թե՛ քրեական տարրերի կողմից: 2015թ. ապրիլի 7-ին ՀՀ քննչական կոմիտեի կողմից հանրապետությունով մեկ խուզարկվել, բերման ենթարկվել, այնուհետ շինծու մեղադրանքներով ձերբակալվել են Հիմնադիր խորհրդարանի անդամները, առգրավվել են նրանց հաղորդակցության միջոցներ, համակարգիչները եւ փաստաթղթերը: Այս գործողություններն իրականացվել են ՀՀ օրենսդրության կոպտագույն խախտումներով:

Ի հավելումն այս ամենի, 2015թ. ապրիլի 11-ին դատարանը բավարարել է ՀՀ քննչական կոմիտեի միջնորդությունը եւ երկու ամսով կալանավորել Հիմնադիր խորհրդարանի 5 անդամների:

Երկրի բարձրագույն իշխանությունների քաղաքական հրահանգը կատարող իրավապահ մարմինների եւ արդարադատությունն ապահովելուն կոչված դատական ատյանների՝ իրենց ապօրինի գործողությունների հիմնավորումները, ակնհայտորեն, չեն դիմանում որեւէ քննադատության: 2015թ. ապրիլի 24-ին հրապարակային միջոցառումների անցկացման վայրերում իբրեւ թե զանգվածային անկարգությունների կազմակերպումը կանխելու մասին ՀՀ քննչական կոմիտեի հայտարարությունը արժանահավատ չէ, խախտում է անմեղության կանխավարկածը եւ հավաքների ազատության իրավունքը, իսկ ձերբակալվածների բնակարաններում խուզարկությունների արդյունքում առգրավված խոհանոցային դանակները, ապակե շիշը, ծխախոտի եւ սոդայի տուփերը որպես հավանական հանցագործությունների գործիքներ ներկայացնելը՝ պարզապես զավեշտալի է:

ՀՀ քննչական կոմիտեի եւ ԱԱԾ-ի գործողությունները մենք գնահատում ենք որպես ՀՀ քաղաքացու սահմանադրական իրավունքների հերթական կոպտագույն ոտնահարում։

ՀՀ իշխանություններից պահանջում ենք անհապաղ ազատ արձակել բոլոր ձերբակալվածներին, իսկ ապօրինի գործողություններ իրականացնողներին` ենթարկել պատասխանատվության: