Թողարկում 216

EU-Armenia-baner1Հայաստանի միջազգային հանրությունը մեծարում է իրավունքների պաշտպաններին

5 հունիսի, 2015թ.

Հայաստանում Եվրամիության պատվիրակություն

Լուսանկարները՝ iravaban.net-ի

DSC06769-copyԵրեւան, Հայաստանի Հանրապետություն. ԱՄՆ դեսպանությունը, Հայաստանում Եվրամիության պատվիրակությունը, Բրիտանական դեսպանությունը, ԵԱՀԿ երեւանյան գրասենյակը, Եվրախորհրդի երեւանյան գրասենյակը եւ Միավորված ազգերի կազմակերպության հայաստանյան գրասենյակը «Կոնգրես» հյուրանոցում տեղի ունեցած Համընդհանուր իրավունքների մրցանակաբաշխության ընթացքում իրենց գնահատանքը հայտնեցին այն անձանց, ովքեր հանդես են գալիս Հայաստանում մարդու իրավունքների, հաշվետու կառավարման, քաղաքացիական ակտիվության, տեղական ինքնակառավարման ոլորտի բարեփոխումների ու ազատ խոսքի խթանման դիրքերից: Համընդհանուր իրավունքների մրցանակաբաշխությունը մի շարք օտարերկրյա առաքելությունների առաջին համատեղ նախաձեռնությունն էր, որով 2012թ.-ից նշանավորվում են մարդու իրավունքների առաջխաղացման ոլորտում Հայաստանի քաղաքացիական իրավունքների ակտիվիստների, պետական պաշտոնյաների, լրատվամիջոցների եւ քաղաքացիական հասարակության ներկայացուցիչների ունեցած ներդրումները: Միջոցառմանը մասնակցում էին Հայաստանի Հանրապետության պետական պաշտոնյաներ, օտարերկրյա դիվանագետներ, հասարակական կազմակերպությունների եւ ԶԼՄ-ների ներկայացուցիչներ:

ԵԱՀԿ երեւանյան գրասենյակի ղեկավար դեսպան Անդրեյ Սորոկինը «Ինֆորմացիայի ազատության կենտրոն»-ի նախագահ Շուշան Դոյդոյանին հանձնեց «Ազատության պաշտպան» մրցանակը: «ԵԱՀԿ-ի վաղեմի գործընկեր Շուշան Դոյդոյանը միշտ եղել է մարդու իրավունքների եւ հիմնարար ազատությունների անկոտրուն պաշտպան: Մեր գրասենյակը բարձր է գնահատում տիկին Դոյդոյանի նվիրվածությունը՝ բաց, թափանցիկ եւ հաշվետու կառավարման խթանմանը, ինչպես նաեւ նրա ջանքերը՝ հիմնելու այլընտրանքային մեխանիզմներ՝ ԶԼՄ-ների հետ կապված խնդիրների լուծման համար», – նշեց պրն Սորոկինը:

Հայաստանում ԵՄ պատվիրակության գործերի հավատարմատար Դիրկ Լորենցը «Ընդդեմ կանանց նկատմամբ բռնության» կոալիցիային հանձնեց «Խիզախ կին» մրցանակը: «Եվրոպական միությունը բարձր է գնահատում «Ընդդեմ կանանց նկատմամբ բռնության» կոալիցիայի ջանքերն ուղղված կանանց իրավունքների պաշտպանության խթանմանն ու Հայաստանում ընտանեկան բռնության զոհերի աջակցությանը», – ասաց պարոն Լորենցը:

Հայաստանում Միացյալ Թագավորության դեսպան Ն.Գ. Քեթի Լիչը «Մեդիա գերազանցություն» մրցանակը հանձնեց Զարուհի Մեջլումյանին: «Ամբողջ աշխարհում լրագրողները վճռորոշ դեր են խաղում արդարադատության համակարգի ձախողումները վեր հանելու գործում: Որոշ լրագրողներ իրականում շահերի պաշտպաններ են. ակտիվորեն, գիտակցաբար եւ հատուկ լուսաբանում են անարդարությունները, սխալը ճիշտ են դարձնում, բարձրացնում են իրազեկությունը, օգնում են անհատներին եւ մատնացույց են անում համակարգային խնդիրները: Ես ուրախ եմ հայտարարել, որ այս տարվա «Մեդիա գերազանցություն» մրցանակը տրվում է Զարուհի Մեջլումյանին՝ իր բացառիկ արհեստավարժության եւ ցմահ դատապարտյալների մասին գրելու ու նրանց իրավունքները պաշտպանելու համար», – ասաց Ն.Գ. Քեթի Լիչը:

ՀՀ-ում ԱՄՆ դեսպան Ռիչարդ Միլսը Կառավարության բարեփոխիչ անվանակարգում Համընդհանուր իրավունքների մրցանակը հանձնեց Թրաֆիքինգի դեմ պայքարի աշխատանքային խմբին (ԹՊԱԽ): «Շնորհավորանքներս ԹՊԱԽ-ին  Համընդհանուր իրավունքների մրցանակաբաշխության Կառավարության բարեփոխիչ պարգեւին արժանանալու համար: ԹՊԱԽ-ում նվիրյալներ են, ովքեր իրենց ներդրումն են ունենում թրաֆիքինգի դեմ պայքարում եւ ՀՀ կառավարության ու քաղաքացիական հասարակության համագործակցության մեջ՝ թրաֆիքինգ հանցանքի կանխարգելմանը, տուժողներին աջակցության ցուցաբերմանը, թրաֆիքինգ իրականացնողների նկատմամբ քրեական հետապնդումների ապահովմանն ու գործընկերությունների ձեւավորմանն ուղղված ծրագրերի իրականացման միջոցով: ԹՊԱԽ-ը կառավարության ու քաղաքացիական հասարակության համագործակցության լավագույն օրինակն է, իսկ գործունեության տպավորիչ արդյունքները փաստում են, որ երբ կառավարությունն ու քաղաքացիական հասարակությունն աշխատում են միասին, լսում միմյանց, ապա փոփոխությունների կատարմանն ուղղված նրանց ջանքերն առավել արդյունավետ են», – ասաց դեսպան Միլսը:

Եվրոպայի խորհրդի երեւանյան գրասենյակի ղեկավար տիկին Նատալյա Վուտովան հանձնեց «Տեղական ինքնակառավարման բարեփոխումների առաջատարի» մրցանակը Ախուրյանի գյուղապետ պարոն Արծրունի Իգիթյանին: «Պարոն Իգիթյանի ստեղծագործ եւ շրջակա միջավայրի խնդիրների նկատմամբ հոգատար ղեկավարման շնորհիվ Ախուրյան համայնքը դարձել է ապրելու համար ավելի առողջ ու բարենպաստ վայր, որտեղ քաղաքացիների սոցիալական իրավունքներն ավելի լավ են պաշտպանվում եւ խթանվում», – ասաց տիկին Վուտովան:

DSC06817-copyՄԱԿ-ի մշտական համակարգող Բրեդլի Բուզետտոն «Ներառման խթանում» մրցանակը հանձնեց Ունիսոն ՀԿ-ի գործադիր տնօրեն Արմեն Ալավերդյանին: «Պարոն Ալավերդյանը հանդիսանում է Հայաստանում հաշմանդամություն ունեցող անձանց ծառայությունների բարելավման առաջատամարտիկը: Նրա աշխատանքը հանգեցրել է հաշմանդամություն ունեցող անձանց սոցիալական, տնտեսական եւ մշակութային ինտեգրմանը: Նշենք մի քանի օրինակ. նա բարելավել է Երեւանի հասանելիությունը՝ առավել հարմարավետ դարձնելով քաղաքային ավտոբուսներն ու կառուցելով թեքահարթակներ, աշխատանքային հնարավորություններ ստեղծել հաշմանդամություն ունեցող տասնյակ անձանց համար, ինչպես նաեւ առաջիններից է, ով Հայաստանում նախաձեռնեց անկախ ապրելու շարժումը», – ասաց պրն. Բուզետտոն:

 

 

logo

Բորիս Նավասարդյան. «Հայաստանում երկխոսության մշակույթը զարգացած չէ»

Նյութը՝ ըստ «Առավոտ» օրաթերթի հրապարակումների

ԸՊ

Լուսանկարը՝ ՀՀ ԱՆ կայքէջի

Երեւանի մամուլի ակումբը, Արեւելյան գործընկերության քաղաքացիական հասարակության ֆորումի Հայաստանի ազգային պլատֆորմը հունիսի 3-ին ներկայացրեցին «Հայաստանում քաղաքացիական հասարակության մասնակցությունը քաղաքականության համաձայնեցման շուրջ երկխոսությանը» հետազոտության արդյունքները: Հետազոտությունն իրականացել է «Քաղաքացիական հասարակություն: Երկխոսություն հանուն առաջընթացի» ծրագրի շրջանակներում:

Երեւանի մամուլի ակումբի նախագահ Բորիս Նավասարդյանը նշեց, որ հետազոտության ընթացքում տարբեր շերտեր ներկայացնող քսան քաղաքացիների հետ խորացված հարցազրույցներ են անցկացվել, քննարկումներ են կատարվել եւ ուսումնասիրվել է լրատվամիջոցների աշխատանքը: Ընտրվել են հանրային նշանակություն ունեցող իրադարձությունները ակտիվ լուսաբանող 6 լրատվամիջոցներ՝ Հանրային, «Արմենիա», «Երկիր մեդիա» հեռուստաընկերությունները եւ Aravot.am, News.am եւ Lragir.am կայքերը:

«Մեր ուսումնասիրության մասնակիցների կողմից մի հարցում փոխհամաձայնություն կա, այն է, որ երկխոսությունը շատ կարեւոր է երկրի զարգացման համար: Այդ կարծիքին են ե՛ւ կառավարության, ե՛ւ խորհրդարանի, ե՛ւ քաղաքացիական հասարակության ներկայացուցիչները: Միեւնույն ժամանակ՝ այդ երկխոսության գնահատականը տարբեր է: Եթե պաշտոնական ատյանների ներկայացուցիչները գտնում են, որ հիմնականում դրական գործընթաց է, եւ նույնիսկ, եթե կան բացթողումներ, դրանք ժամանակի հետ ուղղվելու են, այն դեպքում, երբ քաղաքացիական հասարակության ներկայացուցիչների մեծ մասը եւ ընդդիմությունը համարում է, որ լուրջ համակարգային փոփոխություններ են անհրաժեշտ Հայաստանի ներքին քաղաքականության մեջ, որպեսզի երկխոսության արդյունավետությունը բարձրացվի»,- ասաց նա: Բորիս Նավասարդյանը նկատեց, որ վստահության մեծ պակաս կա քաղաքացիական հասարակության եւ իշխանության միջեւ. «Հայաստանում երկխոսության մշակույթը զարգացած չէ, եւ նույնիսկ, եթե երկու կողմերը պատրաստ են դրան, մեխանիզմները արդյունավետ չեն գործում: Մշակույթի զարգացման համար մեծ ջանքեր են պետք»:

Համաժողովին մասնակցում էր ՀՀ արդարադատության փոխնախարար Սուրեն Քրմոյանը, որն իր խոսքում նշեց. «Մենք՝ որպես իշխանության ներկայացուցիչներ, շատ ողջունելի ենք համարում այս հետազոտությունը: Պետությունը շատ կարեւոր է համարում քաղաքացիական հասարակության մասնակցությունը ցանկացած ոլորտում քաղաքականության, իրավական ակտերի մշակման եւ կյանքի կոչելու գործում: Պետությունը ստեղծել է համապատասխան մեխանիզմներ, որոնց միջոցով քաղաքացիական հասարակությունը, հասարակական կազմակերպությունները կարող են իրենց մասնակցությունն ունենալ պետական քաղաքականության եւ համապատասխան իրավական ակտերի մշակմանը»: Սուրեն Քրմոյանը շեշտեց, որ իրենք հասարակական կազմակերպությունների հետ կատարելագործում են տեղեկատվության  ազատության մեխանիզմները եւ նաեւ ստեղծում են հանրային խորհուրդների մեխանիզմ, որը իր կարծիքով՝ խթանելու է երկխոսության գործընթացը:

Հանդիպմանը ներկա էին նաեւ Կոնրադ Ադենաուեր հիմնադրամի «Քաղաքացիական հասարակություն։ Երկխոսություն հանուն առաջընթացի»  ծրագրի թիմի ղեկավար Շտեֆան Մալերիուսը, Հայաստանում Եվրամիության պատվիրակության քաղաքական հարցերի պատասխանատու Անդրեյ Դիդենկոն, ՔՀԿ-ների ներկայացուցիչներ, այլք:

Advertisements
This entry was posted in Հայերեն. Bookmark the permalink.