Թողարկում 78

ՔՀՀ պատվիրակների ժողով Երեւանում

ԱլԳ Քաղաքացիական հասարակության համաժողովի Ղեկավար կոմիտեի՝ ՔՀՀ Հայաստանի ազգային պլատֆորմում առկա իրավիճակի վերաբերյալ 2011թ. նոյեմբերի 4-ին տարածած հայտարարության համաձայն (տե´ս ԱլԳ հայաստանյան տեղեկագիր, Թողարկում 76)՝ 2011թ. նոյեմբերի 21-ին Երեւանի Կոնգրես հյուրանոցի «Պիկասո» դահլիճում տեղի ունեցավ ՔՀՀ 3 հանդիպումների պատվիրակների ժողովը, որը մասնավորապես քննարկեց եւ հաստատեց «Արեւելյան գործընկերության Հայաստանի ազգային պլատֆորմի   կազմակերպչական սկզբունքները»:

Ժողովին մասնակցած 25 կազմակերպություններից «Կազմակերպչական սկզբունքներին» կողմ քվեարկեցին 22-ը, 3-ը՝ ձեռնպահ:

Այսպիսով, ընդունված «Կազմակերպչական սկզբունքներին» համապատասխան՝ Հայաստանի ազգային պլատֆորմի նորաստեղծ մարմնի՝ ՔՀՀ պատվիրակների ընդհանուր ժողովի անդամ են հանդիսանում հետեւյալ կազմակերպությունները:

1. «Ասպարեզ» լրագրողների ակումբ
2. Բաց հասարակության հիմնադրամներ – Հայաստան
3. Գլոբալիզացիայի եւ տարածքային համագործակցության վերլուծական  կենտրոն
4. Եվրասիա համագործակցություն հիմնադրամ
5. Եվրոպական ուսանողների ֆորում- Երեւան
6. Երեւանի մամուլի ակումբ
7. «Էկոտուրիզմ» ՀԿ
8. «Թրանսփարենսի Ինթերնեյշնլ» հակակոռուպցիոն կենտրոն
9. «Ինտերնյուս» մամուլի աջակցության ՀԿ
10. Համալսարանական կրթությամբ կանանց ասոցիացիա
11. Համայնքների ֆինանսիստների միավորում
12. Հայաստանի արհմիությունների կոնֆեդերացիա
13. Հայաստանի գործատուների հանրապետական միություն (ՀԳՀՄ)
14. Հայաստանի հելսինկյան կոմիտե
15. «Հանուն կայուն մարդկային զարգացման ասոցիացիա»
16. Հելսինկյան քաղաքացիական ասամբլեայի Վանաձորի գրասենյակ
17. Մարտունու կանանց համայնքային խորհուրդ
18. Ա.Դ.Սախարովի անվան Մարդու իրավունքների պաշտպանության կենտրոնի Գյումրիի մասնաճյուղ
19. Սեւծովյան հասարակական կազմակերպությունների միջազգային միություն
20. Սպառողների իրավունքների պաշտպանության ՀԿ
21. «Ունիսոն» ՀԿ
22. «Ուրբան» կայուն զարգացման հիմնադրամ
23. Քաղաքացիական ազգային նախաձեռնություն
24. Քաղաքացիական հասարակության գործընկերության ցանց
25. Քաղաքացիական հասարակության զարգացման կենտրոն

Ըստ «Կազմակերպչական սկզբունքների 3.3.1. կետի՝ ՔՀՀ պատվիրակների ընդհանուր ժողովին կարող են միանալ ՔՀՀ 3 հանդիպումների մնացած 11 պատվիրակները «…որեւէ ակնհայտ ձեւով հաստատելով իրենց մասնակցությունն այդ մարմնում, ամեն տարեկան ժողովից ոչ ուշ, քան 1 շաբաթ առաջ վերահաստատելով իրենց անդամակցությունը` այդ մասին տեղեկացնելով ազգային համակարգողին»:

Ժողովը կազմակերպվել էր ՔՀՀ Հայաստանի ազգային համակարգող Ավետիք Իշխանյանի նախաձեռնությամբ: Ժողովին մասնակցում էին ԱլԳ ՔՀՀ Ղեկավար կոմիտեի նախագահ Վլադ Վելիչկոն եւ ԱլԳ ՔՀՀ Ղեկավար կոմիտեի անդամ Բորիս Նավասարդյանը:

Տիգրան Սարգսյանը եւ Քեթրին Էշթոնն արձանագրել են, որ ՀՀ-ԵՄ հարաբերությունները մտել են զարգացման նոր փուլ

Նոյեմբերի17, 2011

Վարչապետ Տիգրան Սարգսյանն ընդունել է տարածաշրջանային այցով Հայաստան ժամանած Եվրոպական միության արտաքին գործերի եւ անվտանգության քաղաքականության հարցերով բարձր ներկայացուցիչ Քեթրին Էշթոնին: «Վերջին շրջանում մեր հարաբերությունները Եվրոպական միության հետ մտել են զարգացման նոր փուլ: Դրա արդյունքում էլ մենք նոր թափ ենք հաղորդել մեր կողմից իրականացվող բարեփոխումներին»,- ասել է վարչապետը՝ ողջունելով հյուրին կառավարությունում:

Քեթրին Էշթոնը գոհունակություն է հայտնել Հայաստան-ԵՄ հարաբերությունների զարգացման ընթացքից: Եվրոպական միության արտաքին գործերի եւ անվտանգության քաղաքականության հարցերով բարձր ներկայացուցիչն ասել է, որ քաջ գիտակցում է, թե ինչ ծավալի աշխատանք է իրականացնում Հայաստանը ԵՄ-ի հետ Խորը եւ համապարփակ ազատ առեւտրի եւ Ասոցացաման համաձայնագրերի ուղղությամբ: Նշելով, որ տպավորված են տարբեր ուղղություններում Հայաստանի ձեռք բերած առաջընթացով՝ Քեթրին Էշթոնն ընդգծել է, որ կան բոլոր նախադրյալները՝ ՀՀ-ԵՄ հարաբերությունների ավելի խորացման եւ սերտացման համար: «Մենք պատրաստ ենք օգնել Հայաստանին տնտեսական առաջընթացի ապահովման համար, որին էապես կարող է նպաստել Խորը եւ համապարփակ ազատ առեւտրի համաձայնագրի ստորագրումը, որի շուրջ բանակցությունների  գործընթացն առաջիկայում կմտնի նոր փուլ»,- ընդգծել է Քեթրին Էշթոնը:

Այնուհետեւ, Տիգրան Սարգսյանը Քեթրին Էշթոնին է ներկայացրել կառավարության առաջնահերթությունները եւ իրականացվող աշխատանքների ընթացքը՝ մեր երկրում միջին խավի եւ քաղաքացիական հասարակության ձեւավորման, եվրոպական արժեքների ներդրման ուղղությամբ:
Զրուցակիցներն անդրադարձել են նաեւ տարածաշրջանային եւ այլ հարցերի:

Էդվարդ Նալբանդյանը եւ Քեթրին Էշթոնը քննարկեցին Հայաստան-Եվրոպական միություն դինամիկ զարգացող հարաբերությունները

ՀՀ արտգործնախարարություն

Մամուլի հաղորդագրություն

Նոյեմբերի 17-ին տեղի ունեցավ ԱԳ նախարար Էդվարդ Նալբանդյանի հանդիպումը տարածաշրջանային այցով Երեւանում գտնվող Եվրոպական հանձնաժողովի փոխնախագահ, Եվրոպական միության Արտաքին գործերի եւ անվտանգության քաղաքականության հարցերով բարձր ներկայացուցիչ Քեթրին Էշթոնի հանդիպումը:

Ողջունելով ԵՄ բարձրաստիճան պատվիրակությանը՝ արտգործնախարար Նալբանդյանը նշեց, որ մերձեցումը Եվրոպական ընտանիքի հետ՝ ՀՀ արտաքին քաղաքականության առանցքային ուղղություններից է, եւ գոհունակություն հայտնեց, որ այդ համագործակցությունը տարեցտարի ավելի է ընդլայնվում եւ խորանում: Էդվարդ Նալբանդյանը համոզմունք հայտնեց, որ տիկին Էշթոնի այցելությունը Հայաստան եւ Երեւանում ունեցած արդյունավետ քննարկումները նոր խթան կհաղորդեն երկկողմ համագործակցությանը:

«Մեր հարաբերությունները հիմնված են միեւնույն արժեքային համակարգի վրա, եւ մենք նպատակադրված ենք հետեւողականորեն իրականացնել եվրոպական չափանիշներին համահունչ բարեփոխումներ Հայաստանում», – ասաց Էդվարդ Նալբանդյանը:

Շնորհակալություն հայտնելով ընդունելության համար՝ Քեթրին Էշթոնը նշեց, որ Եվրոպական միությունը կարեւորում է Հայաստանի հետ համակողմանի համագործակցության զարգացումը եւ շարունակելու է իր աջակցությունը մեր երկրի զարգացմանն ու բարեփոխումների իրագործմանը:

Զրուցակիցները գոհունակությամբ արձանագրեցին, որ վերջին շրջանում հարաբերությունները դինամիկ զարգացում են ապրել, որն արտահայտվում է թե´ բարձր մակարդակի շփումներով, թե´ քաղաքական երկխոսության օրակարգի ընդլայնմամբ եւ խորացմամբ, թե´ Ասոցացման համաձայնագրի բանակցություններում շարունակական առաջընթացով, թե´ Խորը եւ համապարփակ ազատ առեւտրի գոտու ստեղծման շուրջ բանակցությունների նախապատրաստական աշխատանքներով, թե´ մուտքի արտոնագրային ռեժիմի դյուրացման ուղղությամբ ձեռնարկվող քայլերով:

Հյուրի խնդրանքով Հայաստանի արտաքին քաղաքական գերատեսչության ղեկավարը ներկայացրեց արցախյան հիմնախնդրի կարգավորման գործընթացի վերջին զարգացումները: Այս ենթատեքստում Քեթրին Էշթոնն իր աջակցությունը հայտնեց ԵԱՀԿ Մինսկի խմբի համանախագահների կողմից ձեռնարկվող ջանքերին:

Էդվարդ Նալբանդյանն ու Քեթրին Էշթոնը մտքեր փոխանակեցին տարածաշրջանային հիմնախնդիրների վերաբերյալ: Այս առումով Եվրոպական հանձնաժողովի փոխնախագահը բարձր գնահատեց տարածաշրջանային հիմնախնդիրների լուծման ուղղությամբ Հայաստանի ղեկավարության կողմից ձեռնարկվող քայլերը:

«Այլ տարբերակներ առաջարկող հռետորաբանությունն օգտակար չէ»

ԵՄ արտաքին գործերի եւ անվտանգության քաղաքականության հարցերով բարձր ներկայացուցիչ Քեթրին Էշթոնի բացառիկ հարցազրույցը Մեդիամաքս-ին

– Հայաստանի վարչապետը եւ այլ բարձրաստիճան պաշտոնյաներ վերջերս հայտարարել են, որ 2012 թվականին նպատակ ունեն անցկացնել «ամենաթափանցիկ եւ արդար ընտրությունները Հայաստանի անկախության 20-ամյա պատմության ընթացքում»: Որքա՞ն կարեւոր են նմանատիպ խոստումները ԵՄ եւ Հայաստանի քաղաքական երկխոսության համար:

– Դա շատ կարեւոր է: Սա մեծ դրական ազդանշան է, եւ մենք ակնկալում ենք, որ այն կվերածվի կոնկրետ քայլերի՝ ընտրությունները լավ կազմակերպելու համար: Ինչպես միշտ, մենք պատրաստ ենք սատարելու եւ խորհուրդ տալու ընտրություններում եւ շատ այլ ոլորտներում, որոնք միասին ձեւավորում են «խորը ժողովրդավարության» գաղափարը, որը դրված է Արեւելյան գործընկերության հիմքում՝ միավորման, խոսքի եւ հավաքների ազատություն, անկախ դատական համակարգի կողմից իրականացվող օրենքի գերակայություն եւ արդար դատավարության իրավունք, արդյունավետ պայքար կոռուպցիայի դեմ, ինչպես նաեւ բարեփոխումներ անվտանգության եւ իրավապահպանության ոլորտներում:

– Եվրոպացի պաշտոնյաներն ասում են, որ ԵՄ-ն պետք է ավելի ակտիվ դերակատարում ունենա Լեռնային Ղարաբաղի հակամարտության կարգավորման գործում: Հաշվի առնելով այն փաստը, որ ԵՄ-ն չի ցանկանում փոխարինել ԵԱՀԿ Մինսկի խմբին, ինչպիսի՞ն եք տեսնում այդ «ավելի ակտիվ դերակատարումը»:

– Մենք լիովին աջակցում ենք ԵԱՀԿ Մինսկի խմբին՝ հակամարտության խաղաղ կարգավորմանը հասնելու իր ջանքերում՝ ուժի չկիրառման, տարածքային ամբողջականության եւ ժողովուրդների ինքնորոշման սկզբունքների հիման վրա:

ԵՄ-ի չի ցանկանում փոխել ձեւաչափը կամ ազդեցություն ունենալ տարբեր կողմերի վրա. մենք առաջարկում ենք ավելի ակտիվ եւ ուժեղ աջակցություն: Մենք կարող ենք օգնել ստեղծել դրական մթնոլորտ, ներառյալ վստահության ստեղծման միջոցներ:

Մեր սեփական պատմությունից մենք ունենք հակամարտությունների կարգավորման եւ հաշտեցման փորձ, որով ցանկանում ենք կիսվել ձեզ հետ: Մենք նաեւ կարծում ենք, որ վաղուց ժամանակն է կարգավորման հասնելու համար, քանի որ դա կնպաստի տարածաշրջանի զարգացմանը, կօգնի կայունություն հաստատել, տարածաշրջանի մարդկանց համար ավելի դյուրին կդարձնի առեւտուրը եւ ճամփորդելը: Այն կօգնի ստեղծել աշխատատեղեր եւ կխթանի տնտեսական աճը: Այլեւս պետք չէ հապաղել: Հակամարտությունը տարածաշրջանին պատանդ է պահում:

– Գաղտնիք չէ, որ Ադրբեջանի նախագահը եւ կառավարության անդամները հաճախակի ռազմատենչ հայտարարություններով են հանդես գալիս՝ ասելով, որ պատերազմը կարող է ԼՂ հարցի կարգավորման միջոց լինել: Այս տարվա ընթացում դուք առնվազն երկու անգամ հրապարակավ քննադատել եք Ադրբեջանին՝ մարդու իրավունքների ոտնահարման համար: Ինչո՞ւ նաեւ կոչ չեք անում Ադրբեջանին՝ դադարեցնել պատերազմի քարոզչությունը:

– Հակամարտության կարգավորմանը հնարավոր է հասնել միայն բանակցությունների միջոցով, եւ այլ տարբերակներ առաջարկող հռետորաբանությունն օգտակար չէ՝ անկախ նրանից, թե ո՞ր կողմն է այն հնչեցնում: Կարեւորը բանակցություններում առաջընթացն է եւ դժվարին փոխզիջումներ անելու՝ երկու կողմերի պատրաստակամությունը:

– Այս տարվա ապրիլին Եվրոպական խորհրդարանն ընդունեց «Եվրոպական հարեւանության քաղաքականության վերանայման» բանաձեւը: Այն կոչ է անում զարգացնել «ոչ պաշտոնական շփումները եւ խորհրդատվությունը անջատված տարածքների հասարակությունների հետ»: Իրատեսակա՞ն է ակնկալել, որ Եվրոպական հանձնաժողովը կհետեւի այս կոչին:

– Վստահության ձեւավորումը՝ ներառելով շփումները մարդկանց միջեւ, անհրաժեշտ է փոխըմբռնումը խթանելու համար: ԵՄ-ն կարող է օգնել երկու կողմերին՝ շփվել միմյանց հետ, հիմքեր պատրաստել լուծում գտնելու համար, ցույց տալ խաղաղության եւ ԵՄ-ի հետ ամուր կապված խաղաղ Կովկասի առավելությունները: